Perioral dermatitis

Hvað er perioral dermatitis?

Perioral dermatitis er bólgusjúkdómur í andliti sem stundum er mjög langvarandi. Hann er einnig nefndur periorificial dermatitis vegna þess að hann er ekki eingöngu í kringum munninn, heldur getur hann komið fram í kringum nef og augu. Sjúkdómurinn birtist helst hjá konum á aldrinum 20-45 ára, sérstaklega konum með ljósa húðgerð, en getur komið upp hjá börnum.

Hvað veldur perioral dermatitis?

Orsök sjúkdómsins er ekki að fullu þekkt en til eru margir þættir sem geta komið perioral dermatitis af stað eða gert sjúkdóminn verri t.d:

• Ýmis konar sterar, eins og sterakrem, sterapúst og stera-nefsprey
• Virkar húðvörur t.d. retinól krem og sýrur
• Of olíukenndar húðvörur
• Hormónabreytingar t.d. meðganga, rétt fyrir blæðingar og einstaka sinnum getnaðarvarnarpillan
• Rangar sólarvarnir
• Tannkrem
• Útfjólublá geislun, hiti og vindur

Hver eru einkenni perioral dermatitis?

Litlar rauðar bólur/blöðrur birtast oftast fyrst við nasavængina eða hliðlægt við augun og breiðast svo út í kring munn eða augu. Svæðið verður rauðara og þornar svo upp og flagnar. Einkennandi er að húðin næst vörunum er eðlileg. Þessu fylgir oft sviða- og þurrkutilfinning í húðinni.

Hvað getur þú gert til að halda einkennum niðri?

Oft hverfur perioral dermatitis þegar húðin fær að vera í friði og án húðvara en hér eru ráð til að vinna á einkennum sjúkdómsins:

• Hættu með allar húðvörur og snyrtivörur sem þú ert að nota, þar með talið sólarvarnir og rakakrem.  Taktu sérstaklega burtu allar virkar húðvörur.
• Þvoðu andlitið eingöngu með vatni á meðan útbrotin eru til staðar og notaðu síðan mildan hreinsi
• Notaðu ilmefnalaust olíulaust rakakrem
• Hættu að nota sterakrem ef þú ert að nota það en hafðu í huga að einkenni perioral dermatitis geta versnað tímabundið þegar þú hættir en það mun ganga yfir
• Keyptu Rosazol krem í næsta apóteki og notaðu það 2x á dag á útbrotin þar til þau hverfa en þó ekki lengur en 3 mánuði þar sem þetta er bólgueyðandi sýklalyf

Hvaða meðferðir geta læknar ávísað gegn perioral dermatitis?

Meðferðarval fer eftir alvarleika og umfangi perioral dermatitis. Ef einföld umhirða húðarinnar og Rosazol krem duga ekki er hægt að fá uppáskrifaðar meðferðir hjá lækni. Á meðal meðferða sem eru í boði eru bólgueyðandi sýklalyfin Doxylin og Lymecycline og bólgueyðandi kremin Elidel og Protopic krem. Finacea krem (Azelaic sýra) er oft notuð sem viðhaldsmeðferð við þrálátan perioral dermatitis en hentar ekki vel ef miklar bólgur eru til staðar.